(લખ્યા તારીખ: જુલાઈ ૨૩, ૨૦૧૩)
(છંદ: લગાગાગા ગાલગા ગાલ| લગાગાગા ગાલગા ગાલ)
કહેશે ના ઊંડેરી વાત દિવાનાને હોય છે ભાન
બધાંમાં તે બોલશે કેમ? દિવાલોને હોય છે કાન
તમે આવો આજ જો આમ શરાબીઓ ભૂલશે પાન
ન મયખાનાં ચાલશે આજ, કલાલોને હોય છે શાન
નથી સારું મારવું સાવ મિયાનોના મારથી આમ
સુનેત્રા મા મીંચશો આંખ! હલાલોને હોય છે જાન
પડી રે’શે આપણે માટ ભરી રાખેલા જળાધાર
જતા રે’શે ઓળવી દૂધ, મરાલોને હોય છે જ્ઞાન
ઠરી જાતી જાતને યાર કરે કોઈ ના કરે યાદ
ધખી જાતી રાતમાં આપ મશાલોને હોય છે માન