સ્ટાઈલ

ઓગસ્ટ 16, 2019

(લખ્યા તારીખ: ઑગસ્ટ ૧૦, ૨૦૧૯)

એ લોકો લગભગ આપણી જ ઉંમરના હતા

આપણે એમના જેવી હેયર સ્ટાઈલ કરતા
એમના જેવા દેખાતા તો આપણે ફુલાતા ન સમાતા
એ લોકો જ્યાં ફરવા જતા ત્યાં જવા આપણે તલસતા

આપણને એમના કૂતરાના જન્મદિવસ યાદ હતા
અને એમની ભાવતી વાનગીઓ આપણેય ગળચતા
આપણે માટે એમના જેવા કેટલાક ડઝન હતા

એમને આપણા અસ્તિત્વની ખબર સુધ્ધાં નહોતી
એમને આપણા જેવા લાખો ફૅન હતા
એ લાખો ક્યાં વસે છે અને શું કરે છે એનાથી બેખબર હતા

જીવનનું ક્રૂર જોર આપણને એમનાથી દૂર ખેંચતું ગયું
વચ્ચે વચ્ચે વાસ્તવિકતાનાં વાદળોની પાર સિતારા ભળાતા
“કાશ! મારું જીવનસાથી તો એમાંનું હોત!”ના ક્યારેક નિઃસાસા પણ નીકળ્યા

નવી પેઢી તો આ નિઃસાસા પણ ન સમજી શકે એમ એ બધા વિસરાઈ ગયા
નવા ઉમેરાતાં રત્નો તળે, સદાભીષણતર યત્નો તળે, ઢબુરાઈ ગયા
અને એમના તીવ્રતમ ચાહકોને, આપણને ફુરસદ પણ ન રહી

હવે ક્યારેક કોઈ ચૅનલ પર ક્યાંક ખૂણે એમના આવે છે વાવડ
કોઈની તબિયત, કોઈનું કુટુંબ, કોઈની કાયદો-વ્યવસ્થા, દેવાળું – એવા ખબર
અને આપણે નગણ્ય, અવગણ્ય, તો ય આપણું સાલું બરાબર!

ધમધમતાં એન્જિન પાટેથી ઉતરી ગયાં અને રમકડાંની ગાડીઓ ટકી રહી
એમને અનુકરણ કરવા યોગ્ય વાતો તો આપણી પાસે પડી રહી!
આખેઆખી સફળતાની વ્યાખ્યા જ સમજણ બહાર છટકી ગઈ!

એમને પણ આપણી જેમ સ્ટાઈલ કરવી હતી – ‘લાઈફ સ્ટાઈલ’!
આપણે હેયર સ્ટાઈલ કરી શક્યા કારણકે આપણને ખાલી ડઝનબંધ જ હતા
એ લોકો લાઇફ સ્ટાઈલ ન કરી શક્યા કારણકે એમને લાખો હતા!

Advertisements

દીર્ઘાયુષ્ય

જુલાઇ 18, 2019

(લખ્યા તારીખ: જુલાઈ ૧૮, ૨૦૧૯)

નેવું વરસની ડોસી પેલી સામે પાટિયે ઝૂલે છે

વરસો યાદ કરે છે ઘેલી, નામ બધાંનાં ભૂલે છે

 

ઘરનાં સૌએ ઝઘડી એને, પ્રેમ કરીને થાક્યા છે

વાત કરું તો પૌત્રવધૂનાં થોડાં પળિયાં પાક્યાં છે

 

ઘરમાં આમ જુઓ તો સાદા સીધા આનંદ મંગળ છે

નખની માંહે રોગ નથી ને ધીમે ખૂટતાં અંજળ છે

 

વેગે વિમાન આવે તેની રાહ જોઈને બેઠી છે

દિકરા કેરા અંતરમાંહે નોખી ચિંતા પેઠી છે

 

“મા તો જાશે તેડું આવે, ત્રીસ અમારાં બાકી છે

મા તો ઘસાણી, કરી કરીને ઘરવાળી યે થાકી છે

 

આ ઉંમરે કેમ બદલાશું?” એવા વિચાર સૂઝે છે

“ગઈ પેઢી”ના પુસ્તક કેરું અઘરું પાનું ખૂલે છે!

મળ્યો ‘તો (ગઝલ)

જૂન 24, 2019

હા, એટલો તો ખજાનો મળ્યો’તો
કે શ્વાસ ખાવા વિસામો મળ્યો’તો

તાંદુલ હતા ત્યારે કા’નો મળ્યો’તો
ભૂખ્યો હતો ને સુદામો મળ્યો’તો

સંયોગ એવો મજાનો મળ્યો’તો
પડછાયો મારો જ સામે મળ્યો’તો

સારો ગણ્યો છો નકામો મળ્યો ‘તો
કાણો મળ્યો ‘તો ન મામો મળ્યો’તો

જીવી ગયો’તો લખ્યું જે ગઝલમાં
શાયર ગજબના ગજાનો મળ્યો’તો

સ્વાતંત્ર્ય

જૂન 13, 2019

(લખ્યા તારીખ: ૨૦૧૫)

(અછાંદસ)

 રહેવું હોય તેમ રહે!

કોઈનેય ન નડવાનો હોય તો

મનમાં આવે તેમ રહે!

સંતોની સેવા કરવી હોય તો

એમની જરૂર ન પડે તેમ રહે!

ઉપરવાળાને શ્વાસ ખાવા દેવા

તારી મેળે તું હેમખેમ રહે!

પછી જરા નવરાશ વધે તો જીવ એમ

આસપાસનાં કુશળક્ષેમ રહે!

પછીય જરા જોર વધે તો જીવ એમ

બાકી વધેલા માટે પ્રેમ રહે!

જળમાં કમળ જેમ રહેતાં ન ફાવે તો

કમળ પર જળની જેમ રહે!

દિકરો મોટો થયો

એપ્રિલ 9, 2019

 (લખ્યા તારીખ: માર્ચ ૨૨, ૨૦૧૯)

 (મારો મોટો પુત્ર અઢાર વર્ષની ઉંમરે વિદેશ ભણવા ગયે એક વરસ થવા આવ્યું. અમને અત્યારે આવું લાગે છે – અને આજથી ત્રીસ વરસ પહેલાં મારાં મા-બાપને પણ આવું જ લાગ્યું હશે. ત્રીસ વરસે મારા પુત્રને પણ આવું જ લાગશે.)

 

દિકરો મોટો થયો

જિન્દગીનો દાખલો સાચો થયો, ખોટો થયો

 

ક્યાં અમે પૂરાં થયાં અને ક્યાંથી એ શરૂ થયો

અમે જાણીએ તે પ્રથમ, દિકરો મોટો થયો

 

સંસ્કારો સિંચાઈ રહ્યા, વ્યક્તિત્વ એ ક્યારે બન્યો

સમજાય ના એવડો ક્યારે થયો પંડે જણ્યો?

 

મન હજી ફંફોસતું રેખા કર્મની જવાબદારીની

સાયકલ ન’તી ફાવતી તે ભાગ્યનો ધણી થયો

 

થોડી દોરી છોડી ત્યાં તો પૂરી થઈ ગઈ ફ઼િરકી

સ્થિર પતંગમાંથી એ ગ્લાઇડર ડગમગતું થયો

 

આંગળી પકડેલ લાગે ત્યાં પાંચ હાથ પૂરો થયો

આંખેથી જે આઘો થયો તે આતમે વળગી રહ્યો

 

ખોળો ધરી, નિહાળી વાદળે ’ને ઘેલું ઈચ્છીએ

આભે રહે, ખોળે રમે એ ચંદ્રમા જે નભ ચડ્યો!

ભવસાગર અને પ્રિયા

એપ્રિલ 7, 2019

(લખ્યા તારીખ: મૅ ૧૧, ૨૦૧૮)

 આ જીવનના સાગરમાં

 ભયંકર વમળો છે

 ઊંચાં ઊંચાં મોજાં ઊછળે છે

 વીજળીના કડાકા-ભડાકા થાય છે

 અનરાધાર વરસાદ વરસી રહ્યો છે

 મારી નૈયા ક્યારની ડૂબી ચૂકી છે

 ઘનઘોર અંધારું છે અને

 હૂહૂકાર કરતો પવન ભયને

 વધારવાનો પ્રયત્ન કરી રહ્યો છે

 …

 પરંતુ પ્રિયે! મને ખાતરી છે કે

 તું મને જરૂર પાર ઉતારીશ!

મેં કસીને પકડી રાખ્યો છે

 .

 .

 .

 તારો કાન!

 

હાઇકુ

એપ્રિલ 7, 2019

(લખ્યા તારીખ: જૂન ૧૪, ૨૦૧૮)

 ગીધ નિઃસાસા

 સંસ્કૃતિને નામે નાખે

 સ્મશાન દ્વારે!

ફ઼ાધર્સ ડે

એપ્રિલ 7, 2019

(આમ તો સ્ત્રીવાદના સાહિત્યના જમાનામાં ’ફ઼ાધર સડે’, છતાં, ’ફ઼ાધર્સ ડે’)

(લખ્યા તારીખ: જૂન ૧૭, ૨૦૧૮)

 હિસાબ મળી ગયો

દાદીને દવા અપાઈ ગઈ

ઘરનાં બારણાં દેવાઈ ગયાં

લાઇટો બંધ થઈ ગઈ

એલાર્મ ચેક થઈ ગયા

છોકરાંને માથે હાથ ફ઼ેરવ્યો

… ’ફ઼ાધર્સ ડે’ પૂરો થયો!

વરસ (મુક્તક)

માર્ચ 6, 2019

(લખ્યા તારીખ: ફ઼ેબ્રુઆરી ૨૨, ૨૦૧૯)

આમ આખું વરસ સરક્યું

 આમ કેવું સરસ સરક્યું!

મૂઠી ખૂલી (હાઈકુ)

માર્ચ 6, 2019

(લખ્યા તારીખ: ફ઼ેબ્રુઆરી ૧૪, ૨૦૧૯)

મૂઠી ખૂલી ’ને

 જૂનું ગયું સરકી

 તો નવું આવ્યું!